السلام عليكم رجعتلكم بحاجه تانيه جديده
صباح الخير 💓 ...بما إن الجو برد و كله قاعد في بيته ... تعالوا أحكيلكم قصه تانية ...
كنت في مرة سألت مجموعة مستخدمين عن أصدقائهم الخيالين الي كانوا معاهم وقت الطفولة ...
و دي واحده من الأجابات ...
"صديقي الخيالي ؟ ... في الحقيقة صديقي الخيالي كان مزيج من الضحك و الرعب في نفس الوقت ...
هو للعلم ... بيتنا يبقي جمب حديقة ملاهي لديزني ... فأظن من الطبيعي إن يكون صديقي الخيالي في فترة طفولتي ...
بطوط ... هو مكنش بطوط فعلا ... هو كان شكله أقرب لإنسان لابس بدلة بطوط زي الي شغالين في الملاهي ...
و أنا كطفل طبعا كنت بناديه بطوط ...و كان دايما بيلعب معايا و انا لوحدي في غرفتي ...أو لما أهلي يروحوا الشغل ... او لما ألعب في الحديقة لوحدي ...
بطوط كان صديق لطيف جدا ... بس كان فيه كام حاجه غريبة فيه لاحظتها في طفولتي ... بدلته كانت مليانه بقع حمرا بلون الدم ...و عيون الشخص الي لابس البدلة (و الي بتظهر من فم البدلة )كانت بتبعث ضوء غريب ...
و الأغرب ... لما كان بيقولي إن لحم بابا و ماما طعمهم حلو و لازم أجرب أدوقه ... أنا الصراحه ببراءة طفل كنت بسأله إزاي ...
فيقولي ... إن كل الي عليا أخد سكينه و اقطع بيها حتة منهم و هما نايمين ...
المبهر إني كطفل متربي و مؤدب ... روحت أستأذن أهلي بكل تلقائية إني أعمل فيهم كده و أقطع حتة من لحمهم ...
و ساعتها مقدرتش أستوعب سبب نظرة الرعب علي وشوشهم لما سألوني عن مين بيقولي الكلام ده ...و أنا رديت بكل تلقائية إنه صديق الخيالي بطوط هو الي قالي ...
للأسف بعدها بسبب خوفهم عليا بعتوني لدكتور نفسي و من وقت ما قولتلهم علي بطوط أصلا معدتش بشوفه ...
المشكلة الكبيرة بقي في الأتي ...
من كام سنة ... كنت بعمل بحث عن مدينة الملاهي الي جمبنا ...و إكتشفت إن في حادثة موت عامل مسجلة فيها ...
العامل كان هو الي بيلبس بدلة بطوط ... و مات لما وقع عليه عمود كهربا في المدينة ...
و من وقت ما إكتشفت المعلومة دي و أنا جسمي بيرتعش كل ما أفتكر "
تعليقات
إرسال تعليق